Os Contos de Castelo do xoves 27 de agosto serán unha oportunidade para compartir historias e experiencias arredor dunha cuestión que forma parte da vida de moitas comunidades: os coidados. A xornada contará coa participación de Hadriana Casla e das mulleres que formaron parte de Mulleres que Contan nos seis territorios polos que pasou o proxecto, así como coa presenza da creadora cubana Mercy Díaz.

O proxecto Mulleres que Contan recupera historias e experiencias de mulleres de diferentes lugares e, a través do documental, achegará tamén ao festival relatos relacionados cos coidados. Algunhas das mulleres participantes conviven co párkinson, unha realidade que fai especialmente significativa a presenza da Asociación Párkinson Galicia-Coruña nesta xornada.

A colaboración entre o Castelo Conta e a entidade xorde así dun xeito natural, a partir dunha conversa na que as experiencias das persoas que precisan coidados e de quen as acompaña teñen tamén o seu espazo. A asociación estará presente nos Contos de Castelo para achegar a súa experiencia no acompañamento das persoas con párkinson, das súas familias e das persoas coidadoras.

A Asociación Párkinson Galicia-Coruña naceu en 1996 da man dun grupo de persoas con párkinson e familiares e, desde entón, traballa para mellorar a calidade de vida das persoas diagnosticadas e do seu entorno. A súa actividade baséase nunha atención integral e centrada na persoa, así como na sensibilización, a formación e o apoio social.

A presenza da asociación permitirá incorporar á xornada a voz e a experiencia de quen traballa diariamente con persoas con párkinson e cos seus entornos, achegando información sobre os retos que implica coidar e ser coidado.