O Castelo Conta tamén se constrúe a partir de pequenas decisións. O que usamos para comer, servir ou compartir durante a festa forma parte da pegada que deixamos no lugar que nos acolle, e por iso a sustentabilidade está presente tamén na maneira de organizar o festival.

Nesta décimo primeira edición, Cartón Atlántica volverá acompañarnos con funxibles de papel e cartón para os xantares e ceas do Castelo Conta, evitando o uso de plásticos dun só uso e reducindo a presenza de materiais menos axeitados para a xestión posterior dos residuos.

A empresa, situada en Bergondo, está especializada na fabricación, manipulación e distribución de produtos de papel e cartón, así como de envases e embalaxes. A súa proximidade co festival fai que esta colaboración sexa tamén unha aposta por traballar con empresas da contorna e incorporar solucións máis responsables desde o propio territorio.

No Castelo Conta, onde a festa se espalla polas aldeas, pola natureza e polos espazos compartidos pola veciñanza, coidar o entorno forma parte tamén da maneira de celebrar. Non se trata só do que acontece durante os concertos, os xantares ou as actividades, senón de pensar no que queda cando rematan.

Por iso, a colaboración con Cartón Atlántica continúa sendo unha peza máis dun festival que procura reducir o seu impacto, respectar os espazos que o acollen e facer compatible a celebración coa protección do territorio. Porque outra volta á festa tamén significa atopar maneiras de celebrala sen deixar atrás máis do necesario.