A luz tamén forma parte da festa. Cando cae o sol, a iluminación comeza a transformar os espazos do Castelo Conta: a praza énchese de ambiente, as eiras convértense en escenarios e a polideportiva acolle parte das grandes citas da programación. É un elemento que acompaña a música, os encontros e as celebracións e que contribúe a facer recoñecibles os espazos do festival.

Nesta décimo primeira edición, Máis Enerxía volverá poñer luz a estes lugares, dando continuidade a unha colaboración que xa acompaña o Castelo Conta desde hai varias edicións. A compañía comparte co festival a súa aposta pola proximidade, a conexión co territorio e o apoio a iniciativas que contribúen a dinamizar Galicia.

A colaboración comezou este ano antes da propia semana do festival. O pasado 12 de agosto, Máis Enerxía acompañou o Castelo Conta no visionado da eclipse total de sol, unha xornada que reuniu a veciñanza e visitantes en Folgueira arredor do fenómeno. Aínda que as nubes dificultaron a observación, o momento da totalidade deixou Castelo ás escuras en pleno serán e converteu a luz (ou a súa ausencia) nunha parte máis da experiencia.

Pero a relación coa luz tamén forma parte da memoria da parroquia. A súa chegada a Castelo hai case 75 anos supuxo unha transformación na vida cotiá das aldeas, modificando os horarios, os costumes e a maneira de relacionarse cos espazos. Hoxe, a luz segue acompañando esa evolución, pero desde unha mirada que tamén pon o foco na responsabilidade coa natureza, no coidado dos lugares que habitamos e na importancia de preservar o territorio que fai posible a vida e a festa en Castelo e en tantos outros lugares.

Así, a colaboración con Máis Enerxía vai máis alá de iluminar os espazos do festival. É tamén unha maneira de conectar a festa que vivimos hoxe coa historia do lugar no que se celebra, facendo da luz un elemento que acompaña a comunidade, a memoria e o futuro de Castelo.